‘బంగార్రాజు’ టీజర్ అదరహో.. సంక్రాంతికి వచ్చేస్తున్నాడు

అక్కినేని నాగార్జున కెరీర్‌లో బిగ్గెస్ట్ కమర్షియల్ బ్లాక్‌బస్టర్‌గా నిలిచిన చిత్రం ‘సోగ్గాడే చిన్నినాయనా’. కొత్త దర్శకుడు కళ్యాణ్ కృష్ణ కురసాల తెరకెక్కించిన ఈ చిత్రం 2016 సంక్రాంతికి విడుదలై సంచలన విజయం సాధించింది. పక్కా ఫ్యామిలీ ఎంటర్‌టైనర్‌గా వచ్చిన సోగ్గాడే సినిమాకు ప్రేక్షకులు బ్రహ్మరథం పట్టారు. ఈ సినిమా ఘనవిజయంతో సీక్వెల్ చేయాలని అప్పుడే నిర్ణయించుకున్నాడు నాగార్జున. అయితే ఇప్పుడు దాన్ని సీక్వెల్ కాకుండా ప్రీక్వెల్ చేసాడు నాగార్జున. అంటే ముందు జరిగే కథ అన్నమాట. దీనికి సంబంధించిన ప్రకటన కూడా అప్పుడే చేసినా అది పట్టాలెక్కడానికి ఐదేళ్ళు పట్టింది. మూడేళ్లుగా ఇప్పుడు అప్పుడూ అంటూ వాయిదా పడుతున్న బంగార్రాజు సంక్రాంతికి వచ్చేస్తున్నాడు. ఇందులో నాగార్జున, రమ్యకృష్ణతో పాటు నాగచైతన్య, కృతి శెట్టిలు కూడా జంటగా నటిస్తున్నారు.

న్యూ ఇయర్ కానుకగా చిత్ర యూనిట్ శనివారం టీజర్ విడుదల చేసింది. టీజర్ చూస్తుంటే ‘సోగ్గాడే చిన్ని నాయనా’ను మించి ఈ సినిమా ఉండబోతుందని తెలుస్తోంది. ఇందులో కామెడీ, రొమాంటిక్ సన్నివేశాలే కాక యాక్షన్, డివోషనల్ సన్నివేశాలు కూడా బాగానే ఉన్నట్లు తెలుస్తుంది. నాగ చైతన్య కూడా తండ్రి లాంటి క్యారెక్టర్‌తో అదరగొట్టేశాడు. ఇక కృతి శెట్టి చాలా క్యూట్‌ లుక్స్‌తో ఆకట్టుకుంటోంది. ఇందులో కృతిశెట్టి గ్రామ సర్పంచ్ గా చేస్తున్నట్టు తెలుస్తుంది. అయితే నాగార్జునకి, నాగ చైతన్యకి మధ్య ఉన్న సంబంధం ఏంటో మాత్రం టీజర్ లో రివీల్ చేయలేదు.