నాగచైతన్యతో విడాకులు తీసుకున్న సమంత ప్రస్తుతం వరుస సినిమాలతో బిజీగా మారింది. లేటెస్ట్ గా ‘పుష్ప’ సినిమాలో ఐటెమ్ సాంగ్ తో సెన్సేషన్ క్రియేట్ చేసిన సంగతి తెలిసిందే. ఈ పాట ఇప్పుడు యూట్యూబ్ ను ఊపేస్తోంది. తెలుగు, తమిళ, హిందీ చిత్రాల్లో సైతం సమంత కథానాయికగా నటిస్తూ సత్తా చాటుకుంటోంది. ఇక సామ్ తాజాగా కమిట్ అయిన తెలుగు సినిమా ‘యశోద’. కొద్ది రోజుల క్రితమే ఈ సినిమా రెగ్యులర్ షూటింగ్ మొదలైంది. కథ వినగానే బాగా ఎగ్జైట్ అయిన సమంత ఈ సినిమాకి గ్రీన్ సిగ్నల్ ఇచ్చిందట. ఇదొక సైంటిఫిక్ థ్రిల్లర్. సూపర్ నేచురల్ ఎలిమెంట్స్ కూడా కథలో భాగంగా వస్తాయి. అయితే ఇందులో సమంత పోషించే పాత్ర ఏంటనే విషయంలో ఒక వార్త సోషల్ మీడియాలో చక్కర్లు కొడుతోంది. తాజా సమాచారం ప్రకారం యశోద చిత్రంలో సమంత నర్స్‌గా నటిస్తోందని టాక్. హీరోయిన్ సెంట్రిక్ స్టోరీ కాబట్టి.. ఆమె పాత్రకి సినిమాలో చాలా ప్రధాన్యత ఉంటుందని అర్ధమవుతోంది. ఆమె పాత్రను డిజైన్ చేసిన తీరు ప్రేక్షకుల్ని థ్రిల్ చేస్తుందని చెబుతున్నారు. హరి, హరీష్ అనే ఇద్దరు దర్శకులు రూపొందిస్తున్న ఈ సినిమాలో మలయాళ నటుడు ఉన్నిముకుందన్ మరో కీలక పాత్ర పోషిస్తున్నారు. ఇంకా వరలక్ష్మి శరత్ కుమార్, రావు రమేశ్, కల్పిక గణేశ్ , సంపత్ రాజ్ ఇతర ముఖ్యపాత్రలు పోషిస్తున్నారు. తెలుగుతో పాటు తమిళ, మలయాళ, కన్నడ భాషల్లో సైతం ఈ సినిమాను విడుదల చేస్తున్నారు. మణిశర్మ సంగీతం అందిస్తున్న ఈ సినిమా వచ్చే ఏడాది సమ్మర్ లో విడుదల కానుంది.
